இக்கூட்டத்தில் பேசிய பா.ம.க. நிர்வாக குழு உறுப்பினர் ஜெயக்குமார்,
"கடந்த காலங்களில் நாம் பல பாடங்களை, படிப்பினையை பெற்றுள்ளோம். அரசியல் சூழ்நிலைக்கு ஏற்ப நாம் வெவ்வேறு கூட்டணியில் இடம் பெற்றது சரியான அணுகுமுறைதான். தமிழக தேர்தலில் இனி யாரிடமும் “சீட்” கேட்டு போக தேவையில்லை. நாம் நமது வலிமையை உணராமல் இருக்கிறோம். தாழ்த்தப்பட்ட, பிற்படுத்தப்பட்ட மக்களுக்காக போராடுகிற, நமது தலைவர் “சீட்” கொடுப்பவராக இருக்க வேண்டுமே தவிர, அதை கேட்பவராக இருக்க கூடாது. திராவிட கட்சிகள் தரும் ஏழு, எட்டு சீட்டுக்களை வைத்துக் கொண்டு மக்களின் கோரிக்கையை நிறைவேற்ற இயலாது.
திராவிட கட்சிகளின் அரசியல் இறுதி கட்டத்துக்கு வந்து விட்டது. திருச்சி சிவா எம்.பி., நம்மை பார்த்து பா.ம.க. பிழைக்க வேண்டும்” என்று கிண்டல் செய்கிறார். நாம் மாற்றி அணி அமைக்க வேண்டும். அதற்கு டாக்டர் ராமதாஸ் தலைமை ஏற்க வேண்டும். அதற்கான முழு தகுதியும், வலிமையும் அவருக்கு உள்ளது. தமிழ் மக்களை பாதுகாக்க மாற்று அரசு அமைவது அவசியம். தமிழகத்தில் திராவிட கட்சிகள் மாறி மாறி ஆட்சி செய்கின்றன. ஆனால் மக்களை காப்பாற்றியதாக வரலாறு இல்லை.
வார்தை ஜாலம், பழி வாங்குவது, இலவசம் வழங்குவது போன்றவற்றையும் இரண்டு திராவிட கட்சிகளும் செய்து வருகின்றன. அப்படிப்பட்ட கட்சிகளுடன் கூட்டணி வைத்துக் கொண்டு மக்களுக்கு எதுவும் செய்ய முடியாது. இந்த இரண்டு கட்சிகளின் செயல்பாடுகளால் அடிதட்டு மக்களின் வாழ்க்கை நாசமாகி வருகிறது. மதுவினால் மக்களின் வாழ்க்கை சூறையாடப்படுகிறது.
இதை எதிர்த்து போராடுவது டாக்டர் ராமதாஸ் மட்டும்தான். முன்னாள், இந்நாள் முதல்வர்களுக்கு இதைப் பற்றி கவலை இல்லை. தமிழ்நாட்டை ஆள வேண்டும் என்பதை தவிர சீர்திருத்த பணியில் அவர்கள் ஈடுபடுவது இல்லை. எனவே தி.மு.க. கூட்டணியில் இருந்து வெளியேறி தமிழ்நாட்டில் மாற்று அணி அமைக்க வேண்டும். அதுதான் மக்கள் கூட்டணி’’என்று பேசினார். அவரை தொடர்ந்து பேசிய பலரும் இதே கருத்தை வலியுறுத்தினார்கள்.
பொதுக்குழுவில் நிறைவேற்றப்பட்ட தீர்மானங்கள்
தலைமை பொதுக்குழு தீர்மானத்தில், கடந்த காலங்களில் தேர்தலுக்காக பா.ம.க கூட்டணியில் இடம் பெற்றிருந்தாலும் தனக்கான கொள்கையை ஒருபோதும் விட்டுக்கொடுத்ததில்லை. சமரசமும் செய்து கொண்டதில்லை. இடஒதுக்கீட்டுக் கொள்கை, கல்விக் கொள்கை, மொழிக் கொள்கை, வேளாண் கொள்கை, மது ஒழிப்புக் கொள்கை, இளைஞர் நலன் சார்ந்த மகளிர் நலன் சார்ந்த கொள்கைகள், சுகாதாரக் கொள்கை, ஈழத்தமிழர் பிரச்சினை, சிறப்புப் பொருளாதார மண்டலம், சில்லரை வணிகம் போன்ற மக்களின் வாழ்வுரிமைக்கான, தமிழக மேம்பாட்டுக்கான நிலைகளில் பா.ம.க ஒருபோதும் விட்டுக்கொடுத்ததில்லை. குரல்கொடுக்கவும், போராடவும் தயங்கியதில்லை. ஒதுங்கியும் நின்றதில்லை.
எனவே பா.ம.க கீழ்க்காணும் முடிவுகளை அறிவிக்கிறது.
1) தமிழகத்தை ஆட்சி செய்த கட்சிகளுக்கு மாற்றாக பா.ம.க தலைமையில் மாற்று அணியை உருவாக்கி அதன்வழி தமிழக மக்களின் உரிமைகளுக்காக போராடுவது என உறுதி பூண்டுள்ளது. இக்கொள்கையில் ஏற்புடைய கட்சிகள், இயக்கங்கள், அமைப்புகள் ஆகியவற்றிற்கும், சனநாயக சமத்துவ சிந்தனையாளர்கள், மனித உரிமை ஆர்வலர்கள், தமிழ் உணர்வாளர்கள் போன்றவர்களுக்கும் பா.ம.க தலைமையிலான மாற்று அணியில் சேர பாட்டாளி மக்கள் கட்சி அழைப்பு விடுக்கிறது.
2) நடப்பு ஆண்டில் நடைபெற உள்ள தமிழக உள்ளாட்சித் தேர்தலிலும், அதன் பிறகு வரும் எல்லா தர்தல்களிலும், பா.ம.க தலைமையிலான அணியே தேர்தலை சந்திக்கும் என இப்பொதுக்குழு முடிவு செய்கிறது.
3) பா.ம.க தலைமையிலான அணியின் கொள்கைகள் மற்றும் செயல்திட்டங்கள் மிக விரைவில் வெளியிடப்படும் என்பதை தமிழக மக்களுக்கு தெரிவித்துக் கொள்கிறோம். இவ்வாறு பாமக தலைமை பொதுக்குழு தீர்மானத்தில் கூறப்பட்டுள்ளது.
கூட்டத்தில் முன்னாள் மத்திய மந்திரி ஏ.கே.மூர்த்தி, குரு எம்.எல்.ஏ., மாநில பொருளாளர் சையத் அக்பர், மற்றும் நிர்வாகிகள் கோபால், ஜெயராமன், அம்பத்தூர் சேகர், ஜமுனா, அருள், கார்த்தி உள்பட பலர் கலந்து கொண்டனர்.
0 கருத்துகள்:
கருத்துரையிடுக