வன்னியர் சங்கம்

புதுச்சேரி :

பாட்டாளி மக்கள் கட்சியின் 22ம் ஆண்டு துவக்க விழா ப்ளிஸ் இன் ஓட்டலில் நேற்று நடந்தது. மாநில செயலாளர் அனந்தராமன் தலைமை தாங்கினார். கட்சி ஆலோசகர் ராமகிருஷ்ணன், நிர்வாகிகள் சுப்ரமணியன், மதியழகன் முன்னிலை வகித்தனர்.

விழாவில், செயலாளர் அனந்தராமன் பேசியது:

இந்த கூட்டத்துக்கு பல தொகுதிகளின் நிர்வாகிகள் வராதது வேதனை அளிக்கிறது. தேர்தலில் வெற்றி பெற்றால்தான் கட்சி என்பது கிடையாது. எந்த நேரத்திலும் மக்கள் பணியாற்ற வேண்டும். துடிப்புடன் பணியாற்றும் புதிய நிர்வாகிகள் விரைவில் நியமிக்கப்பட உள்ளனர். கட்சிக்காக வேலை செய்பவர்களுக்கு வாய்ப்பு அளிக்கப்படும்.

கடந்த கால ஆட்சியாளர்கள் மீது இருந்த வெறுப்பு தேர்தல் தோல்விக்கு ஒரு காரணமாகும். பெரும்பான்மை சமுதாயத்தை சேர்ந்தவரை முதல்வர் பதவியில் இருந்து நீக்கியதால் மக்கள் ஆதங்கத்தில் ஓட்டளித்தனர். இதனால், பா.ம.க., வுக்கு பின்னடைவு ஏற்பட்டது. ஒவ்வொரு தொகுதியிலும் 10 ஆயிரம் ஓட்டுக்களை பா.ம.க., பெற்று தந்துள்ளது. உள்ளாட்சித் தேர்தலை விரைவில் நடத்த அரசு நடவடிக்கை எடுக்க வேண்டும். மாநில தேர்தல் ஆணையரை உடனடியாக நியமிக்க வேண்டும்.

தேர்தலில் நிற்க விரும்புபவர்கள் வரும் 25ம் தேதியில் இருந்து விருப்ப மனு தரலாம். இவ்வாறு அனந்தராமன் பேசினார். விழாவில், துணை செயலாளர்கள் செல்வராஜ், ஜெயபால், ஞானசேகரன், முகமது யூசுப், தொண்டரணி அமைப்பாளர் சதீஷ் உள்ளிட்டோர் கலந்து கொண்டனர்.

இளைஞரணி:

பா.ம.க., இளைஞரணி சார்பில் முத்தியால்பேட்டையில் துவக்க விழா நடந்தது. இளைஞரணி தலைவர் அறிவழகன் வரவேற்றார். செயலாளர் அனந்தராமன், கொடியேற்றினார்.