பூரண மதுவிலக்கு லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
பூரண மதுவிலக்கு லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

பா.ம.க. நிறுவனர் டாக்டர் ராமதாஸ் செய்தியாளர்களுடன் சந்திப்பு


சென்னை:
 
       பா.ம.க. நிறுவனர் டாக்டர் ராமதாஸ் நேற்று சென்னையில் நிருபர்களுக்கு பேட்டி அளித்தார். 
 
அப்போது பா.ம.க. நிறுவனர் டாக்டர் ராமதாஸ் கூறியது:-

               தமிழ்நாட்டில் இலவசங்களை தந்து வறுமையை ஒழிக்கப்போவதாக கூறுகிறார்கள். கடந்த தி.மு.க. ஆட்சியில் இலவச திட்டங்களுக்காக ரூ.70 ஆயிரம் கோடியை வீணாக செலவழித்தார்கள். அப்படியும் ஓட்டு பெற முடியவில்லை.  புதிதாக வந்துள்ள அரசும் மிக்சி, மின்விசிறி, கிரைண்டர், ஆடு, மாடு என்று ஆண்டுக்கு ரூ.20 ஆயிரம் கோடியை செலவிட உள்ளது. 27 சதவீதம் பேர் வறுமைக்கோட்டுக்கு கீழ் வாழ்கிறார்கள்.   இந்த விகிதம் குறைய வில்லை. ஆனால் இலவசங்கள் அதிகரித்து வருகிறது.

             மதுவின் மூலம் வருமானம் இந்த ஆண்டு ரூ.17 ஆயிரம் கோடி என்கிறார்க்ள. இது தான் வளர்ச்சியா? கல்வி, சுகாதாரம், விவசாயம் இவற்றுக்குத்தான் அரசு இலவசமாக தரவேண்டும். சமச்சீர் கல்வியில் முத்துக்குமரன் பரிந்துரையில் பல அம்சங்கள் இன்னும் நிறை வேற்றப்படவில்லை. பொது பாடத்திட்டம் மட்டும்தான் நிறைவேறியுள்ளது. ஆங்கிலோ இந்தியன் ஓரியண்டல், மெட்ரிக்குலேசன் கல்வி வாரியங்களை கலைக்க வேண்டும். ஒரே வாரியத்தின் கீழ் கல்வித்துறை செயல்படவேண்டும். 
 
         தமிழ் நாட்டிற்கு சி.பி.எஸ்.இ. பாடத்திட்டம் தேவையில்லை. அமிதாப்பச்சன் நடித்து வெளிவந்துள்ள ஆரக்ஷன் திரைப்படத்தில் இட ஒதுக்கீட்டுக்கு எதிரான காட்சிகளை நீக்கி விட்டு திரையிட அனுமதிக்கலாம். ராஜீவ் கொலை வழக்கு குற்றவாளிகள் பேரறிவாளன், முருகன், சாந்தன் ஆகியோரது மரண தண்டனையை நிறுத்த சட்டமன்றத்தில் தீர்மானம் நிறைவேற்ற வேண்டும். உள்ளாட்சி தேர்தல் முடிந்ததும் பா.ம.க. சார்பில் மதுக்கடையை மூடும் போராட்டம் தீவிரப்படுத்தப்படும். நானே தலைமை தாங்கி மதுக்கடைகளுக்கு பூட்டு போடுவேன்.

             எங்கள் கட்சியின் கொள்கைகளை போல் வேறு எந்த கட்சிக்கும் கொள்கைகள் இல்லை. திராவிட கட்சிகளோடு சேர்ந்த காரணத்தால் பா.ம.க.வால் வளர முடியவில்லை. இனி அந்த தவறை செய்ய மாட்டேன். மன்னிப்பு கேட்கிறேன் நாங்கள் இணைந்து திராவிட கட்சிகளை ஆட்சியில் அமர்த்தியதற்காக தமிழக மக்களிடம் மன்னிப்பு கேட்டுக் கொள்கிறேன்.  கடந்த 44 ஆண்டுகளாக அரசியல் கலாச்சாரம், கல்வி உள்ளிட்ட அனைத்து துறைகளையும் திராவிட கட்சிகள் சீரழித்து விட்டன. இனி எந்த காலத்திலும் திராவிட கட்சிகளுடன் சேர மாட்டேன். திராவிட கட்சிகளுக்கு மாற்றாக முதன்மை அணியாக செயல்பட வேண்டும் என்று முடிவு செய்துள்ளோம்.

             தகுதி இல்லாத எத்தனையோ பேர் வாரிசுகள் என்பதால் அரசியலுக்கு வந்தது அனைவருக்கும் தெரியும். அன்புமணி ஆனால் அன்புமணிக்கு தகுதி இருந்ததால் மத்திய மந்திரி பதவி கொடுக்கப்பட்டது. சிறந்த முறையில் பணியாற்றி உலக அளவில் 3 விருதுகளையும் பெற்றார். வருகிற பாராளுமன்ற தேர்தலில் அன்புமணி போட்டியிடுவார். புதிய ஆட்சி பொறுப்பேற்ற பிறகும் சட்டம்- ஒழுங்கில் எந்த மாற்றமும் ஏற்படவில்லை. ஊழலை ஒழிக்கவேண்டும் என்பதில் மாற்றுக்கருத்து கிடையாது. அன்னாஹசாரே இவ்வளவு நாளும் எங்கிருந்தார். இப்போதுதான் புதிதாக வந்துள்ளார். அவரது போராட்டத்துக்கு ஏதோ உள்நோக்கமும், பின்னணியும் உள்ளது.  இவ்வாறு அவர் கூறினார்.

       பேட்டியின்போது, பா.ம.க. தலைவர் ஜி.கே. மணி, முன்னாள் மத்திய மந்திரி ஏ.கே. மூர்த்தி, பசுமை தாயகம் அருள், ஜெயராமன் ஆகியோர் உடன் இருந்தனர்.
 
 

புகையிலைப் பொருட்களுக்கு வரி உயர்வு : பா.ம.க. நிறுவனர் டாக்டர் ராமதாஸ் வரவேற்பு

     வரி உயர்வை ரத்து செய்ய வேண்டும்' என்று டாக்டர் ராமதாஸ் வேண்டுகோள் விடுத்துள்ளார். 
 
பா.ம.க. நிறுவனர் டாக்டர் ராமதாஸ் விடுத்துள்ள அறிக்கை

              முதல்-அமைச்சர் ஜெயலலிதா, பொறுப்பேற்ற 2-வது மாதத்திலேயே ரூ.4,200 கோடி அளவுக்கு புதிய வரிச் சுமைகளை மக்களின் தலையில் சுமத்தியிருக்கிறார். வேளாண் பயன்பாட்டிற்கான உரம், பூச்சி மருந்து உள்ளிட்ட பொருட்கள் மீது விதிக்கப்பட்டிருந்த மதிப்புக் கூட்டுவரி ரத்து செய்யப்பட்டிருப்பது வரவேற்கப்படவேண்டிய ஒன்று.

           அதேபோல் பீடி, சிகரெட் உள்ளிட்ட புகையிலைப் பொருட்களுக்கு அளிக்கப்பட்டு வந்த வரிவிலக்கு ரத்து செய்யப்பட்டு அவற்றுக்கு 20 சதவீதம் வரை வரி விதிக்கப்பட்டிருக்கிறது, அதுவும் வரவேற்கத்தக்கது. ஆனால் துணி வகைகள், சமையல் எண்ணெய் உட்பட பொதுமக்கள் பயன்படுத்தும் பல்வேறு வகையான பொருட்களின் மீதான வரி உயர்த்தப்பட்டிருப்பது ஏழை எளிய மக்களை பெரிதும் பாதிக்கும்.  

            மத்திய அரசால் அறிவிக்கப்பட்ட டீசல் விலை உயர்வு காரணமாக அத்தியாவசியப் பொருட்களின் விலைகள் பெருமளவில் உயர்ந்துள்ளன. இந்த நிலையில் மாநில அரசும் வரிகளை உயர்த்தினால் ஏழை எளிய மக்களால் தாங்கிக் கொள்ள முடியாது. 3 வாரங்களில் தமிழக அரசின் நிதிநிலை அறிக்கை தாக்கல் செய்யப்படவிருக்கும் நிலையில், வரி உயர்வு அறிவிக்கப்பட்டிருப்பது ஜனநாயகத்திற்கு எதிரான செயலாகும். எனவே தமிழக அரசால் அறிவிக்கப்பட்டுள்ள மக்களை பாதிக்கும் வரி உயர்வை ரத்து செய்யவேண்டும். இன்னொருபுறம் மது வகைகளின் விலை உயர்த்தப்பட்டுள்ளது.

              தமிழ்நாட்டில் முழுமையான மதுவிலக்கு கொண்டுவரப்பட வேண்டும் என்று நான் தொடர்ந்து வலியுறுத்தி வருகிறேன். ஆனால், தமிழக அரசோ மது விற்பனையை இன்னும் பணம் காய்க்கும் மரமாகக் கருதிக் கொண்டிருப்பது அதிர்ச்சியும் வேதனையும் அளிக்கிறது. தமிழகத்தில் முழுமையான மதுவிலக்கை கொண்டுவர நடவடிக்கை எடுக்கவேண்டும். இவ்வாறு அவர் கூறியுள்ளார்.

மேல்மருவத்தூர் ஆசிரியர் பரந்தாமன் இல்லத் திருமணவிழா: பா.ம.க. நிறுவனர் டாக்டர் ராமதாஸ் பங்கேற்பு

மதுராந்தகம்:

            பா.ம.க. நிறுவனர் டாக்டர் ராமதாஸ் இன்று மேல்மருவத்தூர் அருகே உள்ள சோத்துபாக்கத்தில் ஆசிரியர் பரந்தாமன் மகள் ஓவியா-கோபிநாத் திருமணத்தை நடத்தி வைத்து பேசினார். 
 
பா.ம.க. நிறுவனர் டாக்டர் ராமதாஸ் பேசியது:-

             ஆசிரியர் பரந்தாமன் திருமணத்தை நான்தான் நடத்தி வைத்தேன். இன்று அவரது மகள் திருமணத்தையும் நான்தான் நடத்தி வைக்கிறேன். அந்த அளவு ஆசிரியர் பணியிலும், சமுதாய பணியிலும் அவர் மிகுந்த ஆர்வமுடன் செயல் படுகிறார்.   இந்த சமுதாயத்தில் குடிமகன்கள் அதிக அளவில் உருவாகி வருகிறார்கள்.

             பரந்தாமன் போன்று எத்தனை ஆசிரியர்கள் வந்தாலும் இவர்களை திருத்த முடியாது. தமிழ்நாடு என்ற பெயரை மாற்றி குடிகார நாடு என்று பெயர் வைக்க வேண்டும். குடியால் நான்கு, ஐந்து தலைமுறைகள் சீரழிந்து வருகிறது. இதில் ஆட்சியாளர்களுக்கு அக்கறை இல்லை. போட்டி போட்டுக் கொண்டு இலவசங்களை அறிவிக்கின்றனர். அப்பா குடிகாரன் ஆகி டாஸ்மாக் கடையில் கொடுக்கும் வருமானத்தை அரசாங்கம் மகனுக்கு இலவசம் என்ற பெயரில் கொடுக்கிறது.

குடிகார நாட்டுக்கு இலவசம் தேவையா?  
 
                மத்திய அரசு 35 கிலோ அரிசி இலவசமாக கொடுக்கிறது. அதை தவிர்த்து இவர்கள் வேறு ஏதாவது இலவசங்கள்- நல்ல திட்டங்கள் அறிவிக்கலாம். பூரண மதுவிலக்கு அமுலுக்கு வரவேண்டும். தமிழ்நாட்டில் ஒரு சொட்டு சாராயம் இருக்கக் கூடாது. அப்படி வரவேண்டும் என்றால் அதை நடத்துகிற ஆட்சி வரவேண்டும். மக்கள் அதற்கு ஒத்துழைப்பு தரவில்லை.

             சிறுவர்கள் முதல் பெரிய வர்கள் வரை சாராயக் கடை, சினிமா என்ற நிலையிலேயே உள்ளார்கள். சமுதாயம் திருந்த வேண்டும். இன்றைய ஆட்சியில் தலைமை செயலகத்தில் 40 செயலாளர்கள் உள்ளனர். அதில் 12 பேர் உயர் சாதியை சேர்ந்தவர்கள். அதில் ஒருவர் மட்டுமே வன்னிய இனத்தை சேர்ந்தவர். இந்த நிலை தொடர்ந்தால் ஆடு, மாடுகள் கொடுப்பார்கள். அதனை மேய்த்துக் கொண்டு இருக்க வேண்டியதுதான். மக்கள் மனம் மாற வேண்டும். இவ்வாறு அவர் பேசினார்.
 

தமிழகத்தில் மதுக்கடைகளை படிப்படியாக மூடவேண்டும்: பாமக நிறுவனர் டாக்டர் ராமதாஸ்

         மதுக்கடைகளை படிப்படியாக மூடவேண்டும் என்று பாமக நிறுவனர் டாக்டர் ராமதாஸ் கூறியுள்ளார்.

இதுகுறித்து பாமக நிறுவனர் டாக்டர் ராமதாஸ் வெளியிட்டுள்ள அறிக்கையில்,

            மது இல்லாத மாநிலத்தை எப்படி உருவாக்குவது? என்று மராட்டிய மாநிலம் வழிகாட்டியிருக்கிறது. மராட்டியத்தில் இனி 25 வயதிற்கும் மேற்பட்டோருக்கு மட்டுமே மது விற்பனை செய்யப்படும் என்றும், ஏதேனும் ஒரு ஊரில் 25 விழுக்காடு மக்கள் எதிர்ப்புத் தெரிவித்தால் அங்குள்ள மதுக்கடைகள் மூடப்படும் என்றும் அம்மாநில அமைச்சரவை முடிவெடுத்துள்ளது. இவை வரவேற்கப்படவேண்டியவை மட்டுமின்றி மற்ற மாநிலங்களால் பின்பற்றப்பட வேண்டியவை ஆகும்.

            மதுவிலக்கு கொள்கையைப் பொறுத்தவரை மராட்டிய அரசு தொடக்கத்திலிருந்தே மக்களின் உணர்வுகளுக்கு மதிப்பளித்து வருகிறது. 1949ஆம் ஆண்டு மும்பை மதுவிலக்கு சட்டப்படி அம்மாநிலத்தில் ஏதேனும் பகுதியில் வசிக்கும் பெண்களில் 50 விழுக்காட்டினர் எதிர்ப்புத் தெரிவித்தால் அங்குள்ள மதுக்கடைகள் மூடப்பட்டு வருகின்றன. இப்போது காந்தியவாதி அன்னா ஹசாரேவின் கோரிக்கையை ஏற்று ஒட்டுமொத்த மக்களில் 25 விழுக்காட்டினர் எதிர்ப்புத் தெரிவித்தாலே மதுக்கடைகள் மூடப்படும் என்று அறிவிக்கப்பட்டிருப்பது பராட்டப்பட வேண்டிய முடிவாகும்.

               ஆனால், தமிழகத்திலோ நீதிமன்றம் உத்தரவிட்டபிறகும் குடியிருப்புப் பகுதிகளிலுள்ள மதுக்கடைகள் மூடப்படுவதில்லை. மராட்டியத்தில் 25 வயதிற்கும் குறைவானவர்களுக்கு மது விற்பனை செய்யப்படாது என்று அறிவிக்கப்பட்டுள்ள நிலையில், தமிழகத்தில் 13 வயது பள்ளி மாணவர்கள் கூட மது குடிப்பதாக செய்திகள் வந்து கொண்டுதான் இருக்கின்றன.

                   தமிழகத்தில் முழுமையான மதுவிலக்கை நடைமுறைப்படுத்த வேண்டும் என்று பாமக பல ஆண்டுகளாகப் போராடி வருகிறது. தமிழகத்தில் புதிய அரசு பதவியேற்றதுமே முழு மதுவிலக்கை கொண்டுவரும்படி நான் வலியுறுத்தி இருந்தேன். அதன் முதல் படியாக மராட்டிய மாநிலத்தில் இருப்பது போல, பொதுமக்கள் எதிர்ப்புத் தெரிவிக்கும் பகுதிகளில் மதுக்கடைகளை உடனடியாக மூட அரசு நடவடிக்கை எடுக்க வேண்டும்.

            25 வயதிற்கும் மேற்பட்டோருக்கு மட்டுமே மது விற்பனை செய்யப்பட வேண்டும். பொது நிகழ்ச்சிகளில் மது பரிமாறப்படுவதற்கு தடை விதிக்க  வேண்டும். நாள்தோறும் காலை 10 மணி முதல்ர பிற்பகல் 1 மணிவரை 3 மணி நேரத்திற்கு மட்டுமே மதுக்கடைகளை திறந்திருக்க வேண்டும். இதையும் படிப்படியாக குறைத்து குறிப்பிட்ட காலத்திற்குள் தமிழகத்தில் முழுமையான மதுவிலக்கை ஏற்படுத்த மாநில அரசு நடவடிக்கை எடுக்க வேண்டும். இந்த நடவடிக்கையால் மதுக்கடை ஊழியர்கள் பாதிக்கப்படாமல் இருக்க அவர்களை படிப்படியாக அரசு ஊழியர்களாக்கி மற்ற துறைகளில் பணியமர்த்த வேண்டும். இவ்வாறு ராமதாஸ் தனது அறிக்கையில் கூறியுள்ளார். 

மனிதன் அழிவிற்கு மதுவே காரணம்: பாமக நிறுவனர் ராமதாஸ்

      பாமக நிர்வாக குழுக் கூட்டம் கட்சியின் நிறுவனர் ராமதாஸ், இளைஞர் அணி தலைவர் அன்புமணி ராமதாஸ் ஆகியோர் தலைமையில் நடைபெற்றது.

           தமிழ்நாட்டில் மதுக்குடிப்பதே குற்றம் என்ற சட்டம் நடைமுறைப்படுத்தப்பட்டு குடிப்பவர்களுக்கு தண்டனை வழங்கப்பட்டு வந்தது. இந்து, இசுலாம், கிறித்தவம், சமணம், புத்தம் போன்ற மதங்களும் அண்ணல் காந்தியடிகள், மூதறிஞர் இராஜாஜி, தந்தை பெரியார், ஓமந்தூர் இராமசாமி ரெட்டியார், பெருந்தலைவர் காமராஜர், பேரறிஞர் அண்ணா போன்ற வழிகாட்டி தலைவர்களும் வள்ளலார், திருவள்ளுவர் போன்றோரும் மதுவின் தீமையை தடுத்து மக்களை பாதுகாக்கும்படி வலியுறுத்தினார்கள்.

              ஆனால், இன்றோ எல்லா பகுதிகளிலும் (டாஸ்மாக்) திறக்கப்பட்டுள்ளதால் பள்ளி, கல்லூரி மாணவர்கள், இளைஞர்கள், முதியோர் என அனைவரும் மதுப்பழக்கத்திற்கு அடிமையாகும் கொடுமை அதிகரித்து வருகிறது. திருமணம், பிறந்த நாள், சமயவிழாக்கள், கோயில் திருவிழாக்கள், துக்க நிகழ்வுகள், பள்ளி கல்லூரி விழாக்கள் என 10 பேர் கூடும் எந்த நிகழ்வாக இருந்தாலும், அதில் விருந்து என்ற பெயரில் குடிக்காதவர்களைக் கூட மது குடிப்பழக்கத்திற்கு ஆளாக்கும் கொடுமையும் ஆங்கிலப் புத்தாண்டு நாளில் குடிப்பழக்கத்தால் ஏற்படும் சீரழிவும் மேலோங்கி வருகின்றன. இதேநிலை தொடர்ந்தால் அடுத்த 5 ஆண்டுகளில் தமிழகத்தில் குடிக்காத இளைஞர்களே இருக்க மாட்டார்கள் என்று வல்லுநர்கள் எச்சரித்துள்ளனர்.

                குடிப்பழத்தால் உடல்நலன் பாதிக்கப்பட்டு இளம் வயதிலேயே குடிகார கணவர்கள் இறப்பதால் இளம்பெண்கள் விதவையாவது தமிழகத்திலும் புதுவையிலும்தான் அதிகம். குடிக்கு அடிமையான கணவர்களின் கொடுமை தாங்க முடியாமல் பெண்கள் அதிக எண்ணிக்கையில் தற்கொலை செய்து கொள்வதும், குடிப்பழக்கத்தால் குடும்பத்தில் நடக்கும் கணவன், மனைவி சண்டையால் சூழல் பாதிக்கப்பட்டு குழந்தைகளின் கல்வி அடியோடு பாதிக்கப்படுவதும், குடிப்பழக்கத்தால் வேலையிழந்து சொத்துக்களை விற்று வறுமையில் வாடும் கொடுமையும், குடித்துவிட்டு வண்டி < ஓட்டுவதால் ஏற்படும் சாலை விபத்துக்களில் சிக்கி உயிரிழப்புகள் மற்றும் உறுப்பு இழப்புகள் அதிக எண்ணிக்கையில் ஏற்படுவதும் தமிழகத்தில்தான் அதிகம். கொலை, கொள்ளை, ஆள்கடத்தல் போன்ற குற்றங்களுக்கும், அடிதடி, சண்டை சச்சரவு, வன்முறை, சட்டம் ஒழுங்கு போன்றவற்றுக்கும் குடிப்பழக்கம்தான் அடிப்படை காரணமாகும்.

              ஆகவே எல்லா குற்றங்களுக்கும் தாய் மது குடிப்பழக்கமே. இவ்வாறு மனித சமுதாயத்தை சீரழித்து வரும் குடிப்பழகத்திலிருந்து மக்களை விடுவித்து அவர்களின் நலனை காக்க பூரண மதுவிலக்கு கொள்கையை நடைமுறைப்படுத்த வேண்டும் என்று தமிழக அரசை பாமக நிர்வாகக் குழு வலியுறுத்திக் கேட்டுக்கொள்கிறது என்று தீர்மானம் நிறைவேற்றப்பட்டுள்ளது.