கோவில்பட்டி சட்டமன்றத் தொகுதி லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
கோவில்பட்டி சட்டமன்றத் தொகுதி லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

கோவில்பட்டியில் மதிமுகவினரிடம் பாமக வேட்பாளர் கோ.ராமச்சந்திரன் வாக்கு சேகரிப்பு

கோவில்பட்டி:

          கோவில்பட்டியில் மதிமுகவினரைச் சந்தித்து பாமக வேட்பாளர் ஆதரவு கேட்டார்.

               கோவில்பட்டியில் மதிமுக சார்பில் "இன்றைய சூழலில் தமிழ்ச் சமுதாயம் ஆளுமை பெற்றிருக்கிறதா, அடங்கியிருக்கிறதா' என்ற தலைப்பில் ஞாயிற்றுக்கிழமை பட்டிமன்றம் நடைபெற்றது. பட்டிமன்றம் நிறைவடைந்தவுடன் கோவில்பட்டி தொகுதி பாட்டாளி மக்கள் கட்சி வேட்பாளர் கோ.ராமச்சந்திரன் அங்கு சென்று, மதிமுக கொள்கை விளக்க அணிச் செயலர் நாஞ்சில் சம்பத் மற்றும் நிர்வாகிகளைச் சந்தித்து வாக்கு சேகரித்தார். அதையடுத்து நாஞ்சில் சம்பத் கோவில்பட்டியில் மாம்பழம் தித்திக்கும் என்றார்.

கோவில்பட்டியில் பாமக நிறுவனர் ராமதாஸ் பிரச்சாரம்

             ஜெயலலிதாவின் தேர்தல் வாக்குறுதிகள் வெறும் ஏட்டுச் சுரைக்காயகத்தான் இருக்கும். 1991ஆம் ஆண்டு அளித்த வாக்குறுதிகளையே அவர் நிறைவேற்றவில்லை என்று பாமக நிறுவனர் ராமதாஸ் தெரிவித்துள்ளார்.

கோவில்பட்டியில் தேர்தல் பிரச்சாரத்தில் பேசிய பாமக நிறுவனர் ராமதாஸ்

              இந்த முறை திமுகவும் அதன் தோழமைக் கட்சிகளும் தேர்தல் அறிக்கையில் அளித்துள்ள வாக்குறுதிகளுக்கு போட்டியாக அதிமுக தேர்தல் அறிக்கையில் வாக்குறுதிகள் மலிந்து காணப்படுகின்றன.  1991ஆம் ஆண்டு முதல் 1996 வரையிலும் பிறகு 2001 முதல் 2006 வரையிலும் பத்தாண்டுகள் காலம் பதவியில் இருந்தபோது என்னென்ன இலவசங்களை நிவாரண உதவிகளை ஜெயலலிதா ரத்து செய்தாரோ அவற்றையெல்லாம் கலைஞர்தான் மீண்டும் கொண்டு வந்து நடைமுறைப்படுத்தினார்.

             இப்போது அவற்றை நாங்களும் வழங்குவோம் என்று ஜெயலலிதா கூறுகிறார். வாக்குறுதிகளுக்கும், வாக்குறுதிகளை அளிப்பவர்களுக்கும் ஒரு நம்பகத்தன்மை இருக்க வேண்டும். இதற்கு முன்பு ஜெயலலிதா ஆட்சியில் இருந்தபோது என்ன செய்தார் என்பதை வைத்துதான் அந்த நம்பகத் தன்மை வரும். எனவே, ஜெயலலிதா அளித்துள்ள வாக்குறுதிகள் எல்லாம் வெறும் ஏட்டளவில் தான் இருக்கும். 1991ல் ஜெயலலிதா அளித்த வாக்குறுதிகளையே அவர் இன்னும் நிறைவேற்றவில்லை.

         2001 முதல் 2006 வரை அரசு ஊழியர்களை ஜெயலலிதா எப்படியெல்லாம் நடத்தினார். ஒரேநாள் உத்தரவில் எத்தனை லட்சம் பேரை வீட்டுக்கு அனுப்பினார் என்பதையெல்லம் சொல்லிக்கொண்டே போகலாம். ஆனால், கலைஞர் கடந்த 5 ஆண்டுகளில் பல சாதனைகளை படைத்துள்ளார். சொன்னதை செய்திருக்கிறார். சொல்லாததையும் செய்திருக்கிறார் என்றார்.

அதிமுகவின் தொகுதிகள் பாமகவுக்கு ஒதுக்கப்பட்டுள்ளது


              அதிமுகவில் இருந்து திமுக சென்ற இரண்டு எம்.எல்.ஏ.க்களின் தொகுதிகள் பாமகவுக்கு ஒதுக்கப்பட்டுள்ளது.  2006-ம் ஆண்டு சட்டப் பேரவைத் தேர்தலில் ஜெயங்கொண்டம், கோவில்பட்டி தொகுதிகளில் அதிமுக போட்டியிட்டு வெற்றி பெற்றது. இந்தத் தொகுதிகளில் ஜெயங்கொண்டத்தில் ராஜேந்திரனும், கோவில்பட்டியில் ராதாகிருஷ்ணனும் வெற்றி வாகை சூடினர். இருவரும் அதிமுக அணியில் இருந்து அண்மையில் திமுகவுக்குத் தாவினர். அதிகாரப்பூர்வமாக அறிவித்து கட்சி மாறினால் எம்.எல்.ஏ. பதவி பறிபோகும் என்ற  நிலையில் பேரவைச் செயல்பாடுகளில் திமுகவினராக இருந்தனர்.  

தொகுதிகள் பறிப்பு: 

                திமுக பிரமுகர்களாக இருப்பதால், தாங்கள் வெற்றிபெற்று எம்.எல்.ஏ.க்களாக இருக்கும் தொகுதிகள் மீண்டும் தங்களுக்கு ஒதுக்கப்படும் என அவர்கள் இருவரும் எதிர்பார்த்தனர்.  ஆனால், ஜெயங்கொண்டம், கோவில்பட்டி ஆகிய இரு தொகுதிகளும் பாமகவுக்கு ஒதுக்கப்பட்டுள்ளது. இடதுசாரிகள், மதிமுக செல்வாக்கு பெற்ற கோவில்பட்டி தொகுதி பாமகவுக்கு அளிக்கப்பட்டுள்ளது அனைவரையும் ஆச்சரியத்தில் ஆழ்த்தியுள்ளது. கோவில்பட்டி பகுதியில் தண்ணீர் பிரச்னை தொடர்கதையாக உள்ளது. இதைத் தீர்ப்பதில் திமுக அரசு தவறி விட்டதாக பரவலான குற்றச்சாட்டு இருக்கும் நிலையில், அந்தத் தொகுதி பாமகவுக்கு ஒதுக்கப்பட்டுள்ளது குறிப்பிடத்தக்கது.