சேலம்:
சேலம் மாநகராட்சி மேயர் பதவிக்கும், மற்றும் 60 வார்டு கவுன்சிலர்கள் பதவிகளுக்குமான தேர்தல் வருகிற 17-ந் தேதி நடைபெறுகிறது. இதற்கான வேட்பு மனு தாக்கல் கடந்த 22-ந் தேதி தொடங்கியது. மனு தாக்கல் செய்ய 29-ந் தேதி கடைசி நாளாகும்.
இந்த தேர்தலில் பா.ம.க. கட்சியின் மாநில இளைஞர் அணி செயலாளர் இரா.அருளை சேலம் மேயர் வேட்பாளராக கட்சியின் நிறுவனர் டாக்டர் ராமதாஸ் அறிவித்தார். அதேபோல் மாநகராட்சியின் 60 வார்டுகளில் போட்டியிடும் வேட்பாளர்கள் விவரமும் அறிவிக்கப்பட்டுள்ளது. அவர்களில் பலர் நேற்று முன்தினம் வேட்பு மனு தாக்கல் செய்தனர்.
இந்த நிலையில் பா.ம.க.வின் சேலம் மேயர் வேட்பாளர் இரா.அருள் நேற்று வேட்பு மனு தாக்கல் செய்தார். முன்னதாக அவர் நேற்று காலை 10 மணி அளவில் சேலம் டவுனில் உள்ள திருவள்ளுவர் சிலைக்கு வந்து மாலை அணிவித்தார். மேலும் நேற்று "தமிழர் தந்தை'' சி.பா.ஆதித்தனாரின் பிறந்தநாளையொட்டி திருவள்ளுவர் சிலை அருகிலேயே மலர்களால் அலங்கரிக்கப்பட்ட சி.பா.ஆதித்தனாரின் படத்தை வைத்து, படத்துக்கு மாலை அணிவித்து மரியாதை செலுத்தினார்.
தொடர்ந்து அவர் சேலம் மாவட்ட கலெக்டர் அலுவலகம் அருகில் உள்ள பெரியார் சிலை, மாநகராட்சி தொங்கும் பூங்கா அருகே உள்ள அம்பேத்கார் சிலை ஆகியவற்றுக்கு மாலை அணிவித்து மரியாதை செலுத்தினார். இந்த நிகழ்ச்சியில் பா.ம.க. மாநில துணைப் பொதுச் செயலாளர்கள் மு.கார்த்தி, தமிழரசு, சேலம் மாநகர் மாவட்ட பா.ம.க. செயலாளர் கதிர்ராசரத்தினம், வடக்கு மாவட்ட செயலாளர் ஏ.ஆர்.பி. சாம்ராஜ், பசுமை தாயகம் மாநில துணை அமைப்பாளர் சத்திரிய சேகர், மாநகராட்சி கவுன்சிலர் அருள் உள்பட பலர் கலந்துகொண்டனர்.
பின்னர் கட்சி நிர்வாகிகள், தொண்டர்களுடன் இரா.அருள் சேலம் மாநகராட்சி அலுவலகத்துக்கு வந்தார். அங்கு மாநகராட்சி கமிஷனர் லட்சுமிப் பிரியாவிடம் வேட்பு மனு தாக்கல் செய்தார்.
பின்னர் பா.ம.க. கட்சியின் மாநில இளைஞர் அணி செயலாளர் இரா.அரு ள் கூறியது:-
சேலம் மாநகராட்சி மேயர் தேர்தலில் போட்டியிட பா.ம.க. நிறுவனர் டாக்டர் ராமதாஸ், முன்னாள் மத்திய மந்திரி டாக்டர் அன்புமணி ஆகியோர் எனக்கு மீண்டும் வாய்ப்பு கொடுத்துள்ளனர். அவர்களுக்கு இந்த நேரத்தில் என் நன்றியை தெரிவித்துக் கொள்கிறேன். பா.ம.க. ஆட்சிப் பொறுப்பில் இருக்கும்போதெல்லாம் சேலம் மாநகர மற்றும் மாவட்ட மக்களுக்கு நன்மை பயக்கும் திட்டங்களை எல்லாம் செயல்படுத்தி உள்ளது.
பா.ம.க. சார்பில் மத்திய சுகாதார துறை மந்திரியாக இருந்த டாக்டர் அன்புமணி சேலம் மாநகரில் சூப்பர் ஸ்பெஷாலிட்டி ஆஸ்பத்திரி அமைய உறுதுணையாக இருந்து உத்தரவிட்டார். பா.ம.க.வின் சார்பில் மத்திய ரெயில்வே இணை மந்திரியாக இருந்த வேலுவின் முயற்சியின் பலனாக சேலம் ரெயில்வே கோட்டம் உருவானது. எனவே இந்த மேயர் தேர்தலில் பா.ம.க. வேட்பாளராக போட்டியிடும் எனக்கு வாக்குகளைஅளித்து வெற்றி பெறச் செய்தால் குடிநீர் வசதி, கழிவுநீர் வெளியேற்றும் வசதி உள்பட சேலம் மாநகரின் மக்களின் அடிப்படை தேவைகளை நிறைவேற்றுதில் முன்னுரிமை கொடுத்து செயல்படுவேன்.
மேலும் மாநகரை சுத்தமான, பசுமையான மற்றும் சுகாதாரமான நகராக மாற்ற நடவடிக்கை எடுப்பேன். இவ்வாறு அவர் கூறினார்.
0 கருத்துகள்:
கருத்துரையிடுக