திருப்பூரில் பா.ம.க. சார்பில் பேரறிவாளன், சாந்தன், முருகன் தூக்கு தண்டனையைக் குறைக்கக் கோரி ஆர்ப்பாட்டம்

திருப்பூர்:

            ராஜீவ்காந்தி கொலை வழக்கில் குற்றம்சாட்டப்பட்ட பேரறிவாளன், சாந்தன், முருகன் ஆகியோரின் தூக்கு தண்டனையை ரத்து செய்யக் கோரி பாமக சார்பில் திருப்பூரில் திங்கள்கிழமை ஆர்ப்பாட்டம் நடைபெற்றது .

             மாநகராட்சி முன்பு நடந்த இந்த ஆர்ப்பாட்டத்துக்கு, தெற்கு மாவட்டச் செயலர் மு.ரமேஷ் தலைமை வகித்தார். தெற்கு நகரச் செயலர் கே.ஏ.கண்ணன் வரவேற்றார். வடக்கு மாவட்டச் செயலர் ராஜேந்திரன், வடக்கு மாவட்டத் தலைவர் கே.கே.சுப்பிரமணியம் ஆகியோர் முன்னிலை வகித்தனர். மாநில துணை பொதுச் செயலர் சி.வடிவேல் கவுண்டர் சிறப்புரையாற்றினார்.   

              ராஜீவ்காந்தி கொலை வழக்கில் குற்றம்சாட்டப்பட்ட பேரறிவாளன், சாந்தன், முருகன் ஆகியோரின் தூக்கு தண்டனையை ரத்து செய்ய வேண்டும் என ஆர்ப்பாட்டத்தில் வலியுறுத்தப்பட்டது.   மாவட்டப் பொருளாளர் ராதாகிருஷ்ணன், மாவட்ட துணைச் செயலர் பிரகாஷ், பல்லடம் ஒன்றியச் செயலர் புருஷோத்தமன் உள்பட ஏராளமானோர் பங்கேற்றனர்.

கடலூர் மாவட்ட செய்திகள்

திருப்பூரில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

திருப்பூர்:

            சாலை விபத்துகளை தடுக்க வலியுறுத்தி திருப்பூரில் மனித சங்கிலிப் போராட்டம் நடத்தப்பட்டது.  

             பாட்டாளி மக்கள் கட்சி, பசுமைத் தாயகம் அமைப்பு சார்பில் திருப்பூர் பழைய பஸ் நிலையம் அருகே திங்கள்கிழமை நடந்த இந்தப் போராட்டத்துக்கு, கட்சியின் மாநில துணைச் செயலர் சி.வடிவேல் கவுண்டர் தலைமை வகித்தார். சிஸ்மா பொதுச்செயலர் கே.எஸ்.பாபுஜி, கட்சி நிர்வாகிகிள் ராஜேந்திரன், மு.ரமேஷ் ஆகியோர் முன்னிலை வகித்தனர். நிர்வாகி ஜே.பி.ராஜேந்திரன் வரவேற்றார்.  

              சாலை விபத்துகளைத் தடுக்க தெளிவான கொள்கை வகுக்க வேண்டும், போக்குவரத்து விதிமுறைகள், சட்டங்களை முழுமையாக அமல்படுத்த வேண்டும், மது அருந்தவிட்டு வாகனங்களை ஓட்டுவோர் மீது நடவடிக்கை எடுக்க வேண்டும், தலைக்கவசம் அணிவதை கட்டாயமாக்க வேண்டும் என வலியுறுத்தி இந்தப் போராட்டம் நடைபெற்றது.  கட்சி நிர்வாகிகள் வி.எஸ்.கோவிந்தராஜ், கொ.கண்ணன், கே.அ.கண்ணன், வழக்கறிஞர் ஜெ.குமார் உள்ளிட்டோர் கலந்து கொண்டனர்.

கடலூர் மாவட்ட செய்திகள்

பரமத்திவேலூர் சட்டமன்றத் தொகுதி பா.ம.க. வேட்பாளர் வடிவேல் கவுண்டரை ஆதரித்து பா.ம.க.நிறுவனர் டாக்டர் ராமதாஸ் பிரச்சாரம்

பரமத்திவேலூர்:

               பரமத்திவேலூர் பா.ம.க. வேட்பாளர் வடிவேல் கவுண்டரை ஆதரித்து பா.ம.க.நிறுவனர் டாக்டர் ராமதாஸ்  பரமத்தி வேலூர் காமராஜர் சிலை அருகே நடந்த கூட்டத்தில் பேசினார்.

பா.ம.க.நிறுவனர் டாக்டர் ராமதாஸ் அவர் கூறியது:-

                 தேர்தல் ஆணையம் சர்வ..சர்வ...சர்வ... வல்லமை படைத்த தேர்தல் ஆணையம். தேர்தல் அதிகாரிகள், பறக்கும் படையினரின் வாகன சோதனை என்ற பெயரில் விவசாயிகள், வியாபாரிகள், பொதுமக்கள் என அனைவரும் பாதிக்கப்பட்டு உள்ளனர். இதில் சிறு வியாபாரிகள் வியாபாரம் செய்யாமல் முடங்கி போய் உள்ளனர். இதனால் பெரிய பாதிப்பு ஏற்பட்டுள்ளது. இதுவரை இல்லாத அளவுக்கு சோதனை நடப்பது வியப்பாக இருக்கிறது.

                 தேர்தல் ஆணையத்தின் இந்த போக்கு நியாயமானது அல்ல. கலைஞர் ஒரு அறிக்கை வெளியிட்டார். அந்த அறிக்கையை நீதிபதி பார்த்து விட்டு தகவலின் அடிப்படையில் மட்டுமே சோதனை செய்ய வேண்டும் என்றார். தேர்தல் வாக்குறுதிகள் கொடுக்கிற மாதிரியாக இருக்க வேண்டும், அறிவிக்க மாதிரியாக இருக்க கூடாது.  கடந்த சில நாட்களுக்கு முன் கலைஞர் தேர்தல் அறிக்கை வெளியிட்டார். அதே அறிக்கையை பின்பற்றி ஜெயலலிதாவும் வெளியிட்டுள்ளார். பள்ளி குழந்தைகள் காப்பி அடிப்பது போல் உள்ளது. 

 

                  பள்ளி குழந்தைகள் காப்பி அடித்தால் தண்டனை கொடுக்கிறீர்கள், அதே போல் அ.தி.மு.க.வுக்கு பொதுமக்கள் நீங்கள் தண்டனை கொடுக்க வேண்டும். தமிழ்நாடு முழுவதும் நான் சுற்றுப்பயணம் செய்து பெண்களிடம் விசாரித்த போது அவர்கள் கலைஞருக்குத் தான் ஓட்டு என்று சொன்னார்கள். எனவே கலைஞருக்கு ஆதரவு அலை அதிகளவில் உள்ளது. தமிழக மக்களிடம் ஜெயலலிதா 4 ஆடு, 3 மாடு தருவதாக கூறி மக்களை ஆடு, மாடு மேய்க்க சொல்கிறார். கலைஞர் கம்ப்யூட்டர் கொடுத்து உங்களை உயர்த்துகிறார். ஜெயலலிதா ஆடு, மாடுகளை கொடுத்து பின்னுக்கு தள்ளுகிறார். நீங்கள் முன்னேற வேண்டாமா? என்றார். தொடர்ந்து பா.ம.க.வேட்பாளர் வடிவேல் கவுண்டருக்கு மாம்பழம் சின்னத்தில் ஓட்டு கேட்டார்.

                 இந்த கூட்டத்தில் மத்திய மந்திரி காந்திசெல்வன், கே.பி.ராமலிங்கம், எம்.பி., தொகுதி பொறுப்பாளர் பார்இளங்கோ, முன்னாள் எம்.எல்.ஏ மலையப்ப சாமி, நெடுஞ்செழியன் எம்.எல்.ஏ., தி.மு.க. ஒன்றிய செயலாளர் கே.எஸ். மூர்த்தி, மற்றும் கூட்டணி கட்சியினர் கலந்து கொண்டனர்.

கடலூர் மாவட்ட செய்திகள்