பசுமை தாயம் சார்பில் சமச்சீர் கல்விL அடுத்தது என்ன என்ற தலைப்பில் கருத்தரங்கம்

 

 

 

 

சென்னை:

               சமச்சீர் கல்விக்கு அடுத்து என்ன? என்ற தலைப்பில் பசுமைத் தாயகம் சார்பில் சென்னையில் நேற்று கருத்தரங்கம் நடந்தது. சவுமியா அன்புணி தலைமை தாங்கினார். முன்னாள் மத்திய மந்திரி ஏ.கே.மூர்த்தி வரவேற்றார்.

          கருத்தரங்கில் முன்னாள் துணைவேந்தர்கள் முத்துக்குமரன், வசந்திதேவி, கல்வியாளர் ராஜகோபால், ஜி.கே.மணி, வக்கீல் பானு ஆகியோர் பேசினார்கள்.  
 

கருத்தரங்கில் பாமக நிறுவனர் டாக்டர் ராமதாஸ் பேசியது

              சமச்சீர் கல்வியின் ஒரு பகுதியாக பொதுப்பாடத்திட்டம் வந்துள்ளது. அனைவருக்கும் தரமான கல்வி கிடைக்க வேண்டும். பள்ளிகளின் கட்டமைப்பு வசதிகளை மேம்படுத்த வேண்டும். 33 சதவீத பள்ளிகளில் பொதுக்கழிப்பிட வசதியில்லை. 6 ஆயிரத்துக்கும் மேற்பட்ட தொடக்கப்பள்ளிகளும், 529 நடுநிலைப் பள்ளிகளும் அரைகுறை கட்டிடங்களில் இயங்குகிறது.  எனவே கட்டமைப்பு வசதிகளை சீர்படுத்த வேண்டும். மெட்ரிக்குலேசன், ஆங்கிலோ இந்தியன், ஓரியண்டல் கல்வித் துறைகளை கலைத்து விட்டு ஒரே கல்வித்துறையின் கீழ் கொண்டு வரவேண்டும்.  இவ்வாறு அவர் பேசினார்.

              கருத்தரங்கில் மு.ஜெயராமன், பசுமைத்தாயம் செயலாளர் அருள், துணை செயலாளர் எஸ்.கே.சங்கர் உள்பட பலர் கலந்து கொண்டனர்.

கடலூர் மாவட்ட செய்திகள்

பசுமைத் தாயகம் சார்பில் சமச்சீர்க் கல்வி: அடுத்தது என்ன? என்ற தலைப்பில் கருத்தரங்கம்: சௌமியா அன்புமணி தலைமை தாங்குகிறார்

பாமக தலைவர் ஜி.கே.மணி வெளியிட்டுள்ள அறிக்கையில்,

             சமச்சீர்க் கல்வி: அடுத்தது என்ன? என்ற தலைப்பில் பசுமைத் தாயகம் அமைப்பின் சார்பில் சென்னையில் 25.08.2011 அன்று சென்னை தியாகராயர் நகரிலுள்ள சர்.பிட்டிதியாகராயர் அரங்கில் கருத்தரங்கம் நடைபெறுகிறது.

             பசுமைத் தாயகம் அமைப்பின் தலைவர் சௌமியா அன்புமணி தலைமையில் நடைபெறும் இந்த கருத்தரங்கில் பாமக நிறுவனர் ராமதாஸ், பாரதிதாசன் பல்கலைக்கழகத்தின் முன்னாள் துணைவேந்தர் முத்துக்குமரன் மற்றும் பாமக தலைவர் ஜி.கே.மணி உள்ளிட்டோர் கலந்துகொண்டு உரையாற்றுகின்றனர்.  இக்கருத்தரங்கில் உண்மையான சமச்சீர்க் கல்வியை எட்ட ஆக்கப்பூர்வமான பல செயல் திட்டங்கள் முன்வைக்கப்பட உள்ளன என்பதை தெரிவித்துக்கொள்கிறேன் என்று கூறியுள்ளார்.

கடலூர் மாவட்ட செய்திகள்

திருச்சியில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

 

 

 

திருச்சி:

             இந்தியாவில் தான் உலக அளவில் அதிகம் சாலை விபத்துகளில் உயிர்ப்பலி ஏற்படுகிறது. குறிப்பாக தமிழகத்தில் எய்ட்ஸ், புற்றுநோயை விட விபத்தில் பலி எண்ணிக்கை நாளுக்கு நாள் அதிகரித்த வண்ணம் உள்ளது.

          எனவே விபத்தில்லா தமிழகத்தை உருவாக்க கோரி பா.ம.க.வின் பசுமை தாயகம் அமைப்பினர் மனித சங்கிலி போராட்டம் நடத்தி ஆண்டு தோறும் மரக்கன்றுகளை நட்டு விழிப்புணர்வை ஏற்படுத்தி வந்தனர்.   இந்த ஆண்டு பசுமை தயாகம் அமைப்பினர் திங்கட் கிழமை திருச்சி சிந்தாமணி அண்ணாசிலை அருகே மனித சங்கிலி போராட்டம் செய்தனர்.

           சுமார் ஒரு கிலோ மீட்டர் தூரத்துக்கு அணி வகுத்து நின்றனர். நிர்வாகி அறிவுசெல்வன் தலைமையில் கண்ணதாசன், உமாநாத், திலீப்சேகர், சிவக்குமார், தங்கராஜ், அரசுரவி, கிள்ளி வளவன் உள்பட ஏராளமானோர் கலந்து கொண்டனர்.

கடலூர் மாவட்ட செய்திகள்

புதுச்சேரி பா.ம.க. சார்பில் பசுமை தாயகம் ஆண்டு விழா

 

 

புதுச்சேரி:
 

          புதுவை பா.ம.க. சார்பில் பசுமை தாயகம் ஆண்டு விழா திங்கட்கிழமை கொண்டாடப்பட்டது. இதையொட்டி பசுமை தாயகம் மற்றும் பா.ம.க. சார்பில் எல்லைப்பிள்ளை சாவடியில் அமைந்துள்ள ராஜீவ்காந்தி குழந்தைகள் நல மருத்துவமனையில் இன்று பிறந்த 25 குழந்தைகளுக்கு பரிசு பொருட்கள் வழங்கப்பட்டது.

            இதைத்தொடர்ந்து பா.ம.க.வினர் அங்கிருந்து கார் மற்றும் மோட்டார் சைக்கிளில்களில் ஊர்வலமாக புறப்பட்டு வில்லியனூர் விவேகானந்தா அரசு மேல்நிலைப்பள்ளியை அடைந்தனர். அங்கு சுற்று சூழலை வலியுறுத்தும் வகையில் மரக்கன்றுகள் நடப்பட்டன. 

 

              இந்த நிகழ்ச்சிகளுக்கு பா.ம.க. மாநில செயலாளர் அனந்தராமன் தலைமை தாங்கினார். பா.ம.க. ஆலோசகர் ராமகிருஷ்ண கவுண்டர், மாவட்ட தலைவர் சுப்பிரமணியன், செயலாளர் மதியழகன், முன்னாள் எம்.எல்.ஏ. அருள்முருகன் ஆகியோர் முன்னிலை வகித்தனர். நிகழ்ச்சியில் மாநில துணை செயலாளர்கள் பொன்.செல்வராஜ், ஜெயபாலன், ரவி, வி.பி.பி.வேலு, வடிவேலு, வெங்கடேசன், பெருமாள், முகமது யூனூஸ், கிருஷ்ணமூர்த்தி, தேவராஜ், சாந்தா, அசோக், ஆதிலட்சுமி உள்பட பலர் கலந்து கொண்டனர்.
 

கடலூர் மாவட்ட செய்திகள்

கடலூரில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

கடலூர்:

           பசுமைத் தாயகம் அமைப்பின் சார்பில் கடலூரில் மனிதச்சங்கிலி போராட்டம்  திங்கள்கிழமை நடந்தது. 

             சாலை விபத்துக்களில் உலகில் ஆண்டுக்கு 13 லட்சம் பேர் இறக்கிறார்கள். சாலை விபத்துக்களில் உயிரிழப்போர் எண்ணிக்கை உலகிலேயே இந்தியாவில்தான் அதிகம். 2009-ம் ஆண்டில் இந்தியாவில் 1,26,896 பேர் சாலை விபத்துக்களில் இறந்துள்ளனர்.  மக்கள் தொகை அடிப்படையில் 1,000 இந்தியர்களில் தமிழர்கள் 57 பேர். ஆனால் சாலை விபத்துக்களில் உயிரிழக்கும் இந்தியர்கள் 1,000 பேரில் தமிழ்நாட்டினர் 108 பேர். 

              இதனால், தமிழகத்தில் சாலை விபத்துக்களைத் தடுக்க ஒருங்கிணைந்த தெளிவான கொள்கையும் சட்டமும், விதிமுறைகளும் தேவை. விதிமுறைகள் முழுமையாக கண்டிப்புடன் செயல்படுத்தப்பட வேண்டும் என்று பசுமைத் தாயகம் கோரிக்கை விடுத்துள்ளது.  குறிப்பாக குடித்துவிட்டு வாகனம் ஓட்டுவதைத் தடுக்க வேண்டும். தலைக்கவசம் அணிவதைக் கட்டாயமாக்க வேண்டும். வாகனங்களின் வேகத்தைக் கட்டுப்படுத்த வேண்டும். வாகனங்களிóல் பயணிப்போர் கட்டாயம் சீட் பெல்ட் அணிய வேண்டும் என்ற கோரிக்கைகளை வலியுறுத்தி, பசுமைத் தாயகம் அமைப்பின் சார்பில்  கடலூரில் மனிதச்சங்கிலிப் போராட்டம் நடந்தது. 

              திருப்பாப்புலியூர் உழவர் சந்தை அருகில் நடந்த மனிதச் சங்கிலிப் போராட்டத்துக்கு, கடலூர் மாவட்ட பா.ம.க. செயலாளர் பஞ்சமூர்த்தி தலைமை தாங்கினார். பசுமைத் தாயகம் மாவட்ட அமைப்பாளர் மணிகண்டன் முன்னிலை வகித்தார். பா.ம.க. மாவட்டச் செயலாளர்கள் செல்வராஜ், வேணு புவனேசுவரன், தர்மலிங்கம், மாவட்டத் துணைச் செயலாளர் ராதாகிருஷ்ணன், துணைத் தலைவர் திருமூர்த்தி, ஒன்றியச் செயலாளர் தட்சிணாமூர்த்தி, நகரச் செயலாளர் ஆனந்த் உள்ளிட்ட பலரும் சாலையோரம் கைகோர்த்து நின்று, மனிதச் சங்கிலியில் பங்கேற்றனர்.

கடலூர் மாவட்ட செய்திகள்

திருப்பூரில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

திருப்பூர்:

            சாலை விபத்துகளை தடுக்க வலியுறுத்தி திருப்பூரில் மனித சங்கிலிப் போராட்டம் நடத்தப்பட்டது.  

             பாட்டாளி மக்கள் கட்சி, பசுமைத் தாயகம் அமைப்பு சார்பில் திருப்பூர் பழைய பஸ் நிலையம் அருகே திங்கள்கிழமை நடந்த இந்தப் போராட்டத்துக்கு, கட்சியின் மாநில துணைச் செயலர் சி.வடிவேல் கவுண்டர் தலைமை வகித்தார். சிஸ்மா பொதுச்செயலர் கே.எஸ்.பாபுஜி, கட்சி நிர்வாகிகிள் ராஜேந்திரன், மு.ரமேஷ் ஆகியோர் முன்னிலை வகித்தனர். நிர்வாகி ஜே.பி.ராஜேந்திரன் வரவேற்றார்.  

              சாலை விபத்துகளைத் தடுக்க தெளிவான கொள்கை வகுக்க வேண்டும், போக்குவரத்து விதிமுறைகள், சட்டங்களை முழுமையாக அமல்படுத்த வேண்டும், மது அருந்தவிட்டு வாகனங்களை ஓட்டுவோர் மீது நடவடிக்கை எடுக்க வேண்டும், தலைக்கவசம் அணிவதை கட்டாயமாக்க வேண்டும் என வலியுறுத்தி இந்தப் போராட்டம் நடைபெற்றது.  கட்சி நிர்வாகிகள் வி.எஸ்.கோவிந்தராஜ், கொ.கண்ணன், கே.அ.கண்ணன், வழக்கறிஞர் ஜெ.குமார் உள்ளிட்டோர் கலந்து கொண்டனர்.

கடலூர் மாவட்ட செய்திகள்

விழுப்புரம் மாவட்டத்தில்ல பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

 விழுப்புரம்:

            விழுப்புரம் மாவட்ட பசுமைத்தாயகம் அமைப்பின் சார்பில் சாலை விபத்துகளைத் தடுக்க விழிப்புணர்வு மனித சங்கிலி விழுப்புரம் மாவட்ட ஆட்சியரகம் முன்பு திங்கள்கிழமை நடைபெற்றது.

             உலகில் சாலை விபத்துகள் அதிகம் இந்தியாவில் நடக்கிறது, இதில் தமிழகம் முதலிடத்தில் உள்ளது. எனவே சாலை விபத்துகளைத் தடுக்க குடித்துவிட்டு வாகனம் ஓட்டுவதைத் தடுப்பது, கட்டாயம் தலைக்கவசம் அணிவது, வேகத்தைக் கட்டுப்படுத்துவது, கட்டாய வார்ப்பட்டை அணிவது ஆகியவற்றை வலியுறுத்தி இந்த மனித சங்கிலி நடைபெற்றது.

             இந்நிகழ்ச்சிக்கு, பாமக மாநில துணைப் பொதுச் செயலர் செந்தமிழ்செல்வன் தலைமை தாங்கினார். மாநில கொள்கை விளக்க அணிச் செயலர் வியன்ன அரசு சிறப்புரையாற்றினார். இதில்  மாநில துணைத் தலைவர் தங்க.ஜோதி, மாவட்டச் செயலர்கள் பழனிவேலு, மணிமாறன், மாவட்ட இணைச் செயலர் சிவக்குமார், ஜெயக்குமார், மாவட்டத் தலைவர் துரைமுருகன், நகரச் செயலர் தமிழ்செல்வன் உள்ளிட்டோர் கலந்து கொண்டனர்.

கடலூர் மாவட்ட செய்திகள்

வேலூர் மாவட்டத்தில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

வேலூர்:

              வேலூர் மாவட்டத்தில் பசுமை தாயகம் அமைப்பு சார்பில் சாலை விபத்துகளைத் தடுக்க வலியுறுத்தி மனிதச் சங்கிலிப் போராட்டம் திங்கள்கிழமை நடைபெற்றது. 

             வேலூரில் காந்தி சிலை அருகே நடைபெற்ற இந்த மனிதச் சங்கிலியில் பாமக மத்திய மாவட்டச் செயலர் வெங்கடேசன், முன்னாள் மத்திய அமைச்சர் என்.டி. சண்முகம், பாமக மகளிர் அணி வரலட்சுமி உள்ளிட்டோர் பங்கேற்றனர் .சாலை பாதுகாப்பு விழிப்புணர்வு வாசகங்கள் அடங்கிய துண்டு பிரசுரங்களை பசுமை தாயகம் அமைப்பினர் பொதுமக்களுக்கு வழங்கினர். 

அரக்கோணம்

           அரக்கோணம் பழைய பஸ் நிலையத்தில் நடைபெற்ற மனித சங்கிலி நிகழ்ச்சிக்கு வேலூர் கிழக்கு மாவட்ட பாமக தலைவர் அ.ம.கிருஷ்ணன் தலைமை தாங்கினார். மாவட்டச் செயலர் க.சரவணன் தொடங்கி வைத்தார். தொடர்ந்து சாலையில் சென்ற அனைத்து வாகனங்களுக்கும் முகப்பு விளக்கில் கறுப்பு வர்ணங்களை பூசினர். இரு சக்கர வாகனங்களில் செல்வோரிடம் துண்டு பிரசுரங்கள் அளித்து, தலைக்கவசம் அணிந்து செல்லுங்கள், செல்பேசியில் பேசிக்கொண்டு செல்லாதீர்கள் என்பது போன்ற அறிவுரைகளை வழங்கினர். 

               மாநில வன்னியர் சங்க துணை பொதுச் செயலர் ந.ரமணி, பாமக மாவட்ட துணைச் செயலர் அ.மு.வேணுகோபால், மாவட்ட இளைஞர் அணி தலைவர் பொன்.வேலு, மாவட்ட மாணவர் அணி செயலர் கோ.ஏழுமலை உள்ளிட்டோர் பங்கேற்றனர்.

வாலாஜாபேட்டை: 

              வாலாஜாபேட்டையில் வட்டாட்சியர் அலுவலகம் எதிரில் இருந்து இந்தியன் வங்கி வரையிலும் பசுமை தாயக நிர்வாகிகள் விழிப்புணர்வு மனித சங்கலி நடத்தினர். நிகழ்ச்சிக்கு மாவட்டச் செயலர் நந்தகுமார் தலைமை தாங்கினார். முன்னாள் எம்எல்ஏ கே.எல். இளவழகன் தொடங்கி வைத்தார். நிர்வாகிகள் எம்.கே.முரளி, கதிர், எம்.தியாகராஜன் உள்ளிட்டோர் பங்கேற்றனர்.

கடலூர் மாவட்ட செய்திகள்

திருவண்ணாமலையில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

திருவண்ணாமலை:

              சாலை விபத்துகளை தடுக்க நடவடிக்கை எடுக்க வலியுறுத்தி ஒருங்கிணைந்த மாவட்ட பசுமை தாயகம் சார்பில் திருவண்ணாமலை தாலுகா அலுவலகம் அருகே திங்கள்கிழமை மனிதச்சங்கிலி போராட்டம் நடைபெற்றது.

              அதிக வேகமாகவோ, மது அருந்திவிட்டோ வாகனங்களை ஓட்டக்கூடாது. தலைக்கவசம் அணிய வேண்டும். தேசிய நெடுஞ்சாலைகளில் ரவுண்டானா அமைக்க வேண்டும். சாலையை கடக்கும் இடத்தில் வேகத்தடை அமைக்க வேண்டும். ஐ.நா. செயல்திட்டத்தின்படி தமிழகத்தில் முழுமையாக சாலை பாதுகாப்புத் திட்டத்தை அரசு செயல்படுத்த வேண்டும் என வலியுறுத்தி இந்த மனிதச்சங்கிலி போராட்டம் நடைபெற்றது

               பா.ம.க. மாநில துணைப் பொதுச் செயலர் கோ.எதிரொலிமணியன் தலைமை தாங்கினார். வன்னியர் சங்க மாநில துணைத் தலைவர்கள் இரா.காளிதாஸ், சு.மன்னப்பன், மாவட்டச் செயலர்கள் அ.வேலாயுதம், இல.பாண்டியன், இரா.ஜானகிராமன், பசுமை தாயகம் வெங்கடேசன், வே.பழனி உள்பட பலர் கலந்து கொண்டனர்.

கடலூர் மாவட்ட செய்திகள்

திருவள்ளூரில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

திருவள்ளூர்:

         பசுமைத் தாயகம் அமைப்பு சார்பில் சாலை விபத்துக்களை தடுக்கக் கோரி மனித சங்கிலி விழிப்புணர்வு போராட்டம் பாட்டாளி மக்கள் கட்சியின் மாவட்டச் செயலாளர் பாலயோகி தலைமையில் திருவள்ளூரில் நடைபெற்றது. 

              திருவள்ளூர்- பூந்தமல்லி நெடுஞ்சாலையில் நடைபெற்ற மனிதச் சங்கிலியில் மாநில இளைஞர் அணி துணைச் செயலாளர் தினேஷ், வடக்கு மாவட்டச் செயலாளர் ரமேஷ் அம்பத்தூர் நகர்மன்றத் தலைவர் கே.என். சேகர், கிழக்கு ஒன்றிய செயலாளர் வெங்கடேசன் ஆகியோர் முன்னிலை வகித்தனர். இதில் சிறப்பு அழைப்பாளராக முன்னாள் எம்எல்ஏ ரவிராஜ் பங்கேற்று போராட்டத்தை துவக்கி வைத்தார். 

              இந்நிகழ்ச்சியில், சாலை விபத்துக்களில் உலகில் ஆண்டுக்கு 13 லட்சம் பேர் பலியாகின்றனர். ஆண்டுக்கு 5 கோடி பேர் சாலை விபத்தில் காயமடைகின்றனர். 2010-ம் ஆண்டில் தமிழகத்தில் மட்டும் 64 ஆயிரத்து 996 சாலை விபத்துக்கள் நடைபெற்றுள்ள. அதில் 15 ஆயிரத்து 409 பேர் இறந்துள்ளனர். இதற்கு காரணம் பொதுமக்களும், வாகன ஓட்டிகளும் முறையாக சாலை விதிகளை மதிக்காமல் செல்வதேயாகும். 

             அதேபோல் மது அருந்திவிட்டு வாகனம் ஓட்டுவதாலும் ஏராளமான விபத்துக்கள் நடைபெறுகிறது. எனவே பொதுமக்களிடம் சாலை விதிகளை கடைபிடிப்பது குறித்து விழிப்புணர்வு ஏற்படவேண்டும். அதன் மூலம் விபத்துக்கள் குறைய வேண்டும் என வலியுறுத்தி பேசினர். இதில் பசுமைத் தாயகம் மற்றும் பாமக நிர்வாகிகள் ஏராளமானோர் பங்கேற்றனர். 

கடலூர் மாவட்ட செய்திகள்

நாகர்கோவிலில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

நாகர்கோவில்:

           நாகர்கோவிலில் பசுமை தாயகம் அமைப்பு சார்பில் திங்கள்கிழமை மனிதச் சங்கிலி நடத்தப்பட்டது.

          மாநில அளவில் முழுமையான சாலை பாதுகாப்புத் திட்டத்தை செயல்படுத்த அரசு முன்வர வேண்டும் என வலியுறுத்தி நாகர்கோவிலில் அகஸ்தீஸ்வரம் வட்டாட்சியர் அலுவலகம் முன் நடைபெற்ற இந்த மனிதச் சங்கிலிக்கு பசுமைத் தாயகம் மாவட்ட அமைப்பாளர் விஜு தலைமை வகித்தார்.

              கன்னியாகுமரி மேற்கு மாவட்ட பாமக செயலர் ரவி முன்னிலை வகித்தார். கிழக்கு மாவட்டச் செயலர் அலெக்ஸ், மாவட்டத் தலைவர் ரமேஷ், மாநில தொழிற்சங்கச் செயலர் நந்தகோபால், நாகர்கோவில் நகரச் செயலர் ராமதாஸ், குழித்துறை நகரச் செயலர் மற்றும்  மாநில மாணவரணி துணைச் செயலர் சித்தார்த் சங்கர், மாநில துணை பொதுச்செயலர் இரா. அரிகரன், மாநில இளைஞரணி துணைச் செயலர் பைஜு உள்ளிட்டோர் பங்கேற்றனர்.

கடலூர் மாவட்ட செய்திகள்

உடுமலையில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

உடுமலை:

            சாலை விபத்துகளை தடுக்க வலியுறுத்தி உடுமலையில் திங்கள்கிழமை மனித சங்கிலிப் போராட்டம் நடைபெற்றது . 

              பாட்டாளி மக்கள் கட்சியின் பசுமைத் தாயகம் அமைப்பு சார்பில் உடுமலை மத்திய பஸ் நிலையம் எதிரில் நடைபெற்ற இந்த நிகழ்ச்சிக்கு, மாநில துணைப் பொதுச் செயலர் பாலசுந்தரி தலைமை வகித்தார். நகரச் செயலர் காந்தி செல்வம் முன்னிலை வகித்தார்.   சாலை பாதுகாப்பை வலியுறுத்தியும், போக்குவரத்து விதிமுறைகளை முறையாக கடைப்பிடிக்கக் கோரியும் மனித சங்கிலிப் போராட்டம் நடத்தப்பட்டது. மேலும், துண்டுப் பிரசுரங்களும் விநியோகிக்கப்பட்டன.   திருப்பூர் மாவட்டத் தலைவர் புருஷோத்தமன், மாவட்டச் செயலர் பழனிசாமி, நிர்வாகிகள் குணசேகரன், கணக்கன் உள்ளிட்டோர் கலந்து கொண்டனர்.

கடலூர் மாவட்ட செய்திகள்

அரியலூரில் பசுமைத் தாயகம் சார்பில் சாலை விபத்து தடுப்பு விழிப்புணர்வு மனித சங்கிலி

அரியலூர்:

             சாலை விபத்துகளைத் தடுக்கக் கோரி, அரியலூரில் பசுமைத் தாயகம் அமைப்பு சார்பில் திங்கள்கிழமை மனிதச் சங்கிலி நடைபெற்றது.   

            அரியலூர் மாவட்ட பாட்டாளி மக்கள் கட்சியின் செயலர் க. வைத்தி தலைமையில், அரியலூர் அண்ணா சிலையிலிருந்து, அரசு மேல்நிலைப் பள்ளி வரை நடைபெற்ற இந்த மனிதச் சங்கிலியில் மாநிலத் துணைப் பொதுச் செயலர் இரா. பாலு, மாநிலத் துணைத் தலைவர்கள் உலக. சாமித்துரை, கி. கோபி, பெரம்பலூர் மாவட்டச் செயலர் க. செந்தில்குமார், வேப்பூர் ஒன்றியக் குழுத் தலைவர் நீலமேகம் மற்றும் மாவட்ட, ஒன்றிய, நகர நிர்வாகிகள், பொறுப்பாளர்கள் பங்கேற்றனர்.

கடலூர் மாவட்ட செய்திகள்

பசுமைத்தாயகம் சார்பில் மெரினாவில் சாலை விபத்து தடுப்பு விழிப்புணர்வு மனித சங்கிலி

           சாலை விபத்துக்களை தடுக்கும் வகையில் விழிப்புணர்வு குழு அமைக்க கோரி முதல் அமைச்சர் ஜெயலலிதாவை நேரில் சந்தித்து பேச இருப்பதாக முன்னாள் மத்திய அமைச்சர் அன்புமணி ராமதாஸ் கூறினார்.

            சாலை விபத்து தடுப்பு விழிப்புணர்வை வலியுறுத்தி பசுமைத்தாயகம் சார்பில் சென்னை மெரினா கடற்கரை காந்தி சிலை அருகே மனித சங்கிலி நடைபெற்றது. இதில் தனியார் பள்ளி, கல்லூரிகளை சேர்ந்த மாணவ மாணவிகள் கலந்து கொண்டு, நீண்ட சங்கிலி போல் கைகோர்த்து நின்றனர். அவர்கள்  விபத்தை தடுப்போம்...உயிரை காப்போம்' என்பது போன்ற வாசகங்கள் அடங்கிய சிறிய பதாகைகளை கையில் ஏந்தியிருந்தனர்.

இந்த மனிதசங்கிலி விழிப்புணர்வு பிரசாரத்தை தொடங்கி வைத்த முன்னாள் மத்திய அமைச்சர் அன்புமணி ராமதாஸ் பேசுகையில்,

             பசுமைத்தாயகம் கடந்த 17 ஆண்டுகளாக பொது பிரச்சினைகளுக்காக விழிப்புணர்வு நிகழ்ச்சிகள் மற்றும் போராட்டங்களை நடத்தி வருகிறோம். தமிழகம் முழுவதும் 20 லட்சம் மரக்கன்றுகளை நட்டு இருக்கிறோம். குளங்களை தூர்வாரி வருகிறோம். சுற்றுச்சூழலை வலியுறுத்தி பிரசாரம் செய்து வருகிறோம்.

            உலகத்திலேயே அதிகளவில் சாலை விபத்துக்கள் நடப்பது இந்தியாவில் தான். அதிலும் குறிப்பாக தமிழகத்தில் தான் அதிகளவில் சாலை விபத்துக்கள் நடக்கிறது. கடந்த ஆண்டில் மட்டும் தமிழ்நாட்டில் சாலை விபத்தில் 15 ஆயிரம் பேர் இறந்து உள்ளனர். இதில் பெரும்பாலானோர் இளைஞர்கள் தான்.

              40 சதவீத சாலை விபத்துக்களுக்கு குடி போதையும் ஒரு காரணம் என்று ஒரு ஆய்வு தெரிவிக்கிறது. எனவே மது குடித்துக்கொண்டு வாகனம் ஓட்டுபவர்கள் மீது நடவடிக்கை எடுக்க வேண்டும். சீட் பெல்ட் அணிவது, ஹெல்மட் அணிவது ஆகியவற்றை கட்டாயமாக்க வேண்டும். போக்குவரத்து விதிமுறைகளை கடுமையாக்குவது போன்றவற்றை தமிழக அரசு செய்ய வேண்டும்.

            சாலை விபத்துக்களை தடுப்பது தொடர்பாக தமிழக அரசு ஒரு குழு அமைக்க வேண்டும். இதன் மூலம் சாலை விபத்துக்களை குறைப்பதற்கு வேண்டிய நடவடிக்கைகளை அரசு மேற்கொள்ள வேண்டும். இது சம்பந்தமாக தமிழக முதல் அமைச்சர் ஜெயலலிதாவிற்கு கடிதம் எழுத இருக்கிறோம். தேவைப்பட்டால் அவரை நேரில் சந்தித்து இது குறித்து வலியுறுத்துவோம் என்றார்.

கடலூர் மாவட்ட செய்திகள்

பசுமைத் தாயகம் அமைப்பினர் எதிர்ப்பு: மகேந்திர சிங் டோனி நடித்த மதுபான விளம்பர படங்கள் அகற்றம்

            இந்திய கிரிக்கெட் அணி கேப்டன் மகேந்திர சிங் டோனி நடித்த மதுபான விளம்பர படங்கள் அகற்றப்பட்டதற்கு பசுமைத் தாயகம் அமைப்பினர் வரவேற்றுள்ளனர்.


             இந்திய கிரிக்கெட் அணி கேப்டன் மகேந்திர சிங் டோனி நடித்த மதுபான விளம்பரபடங்கள் சென்னை நகரில் பல்வேறு இடங்களில் வைக்கப்பட்டிருந்தன. இதற்கு எதிர்ப்பு தெரிவித்து முன்னாள் மத்திய டாக்டர் அன்புமணி ராமதாஸ், டோனிக்கு கடிதம் எழுதினார். இதைதொடர்ந்து டோனி மதுபான விளம்பரங்களில் இருந்து விலகிக்கொள்ள வேண்டும் என்று பசுமைத்தாயகம் அமைப்பினர் சென்னையில் ஆர்ப்பாட்டம் நடத்தினார்கள்.

                கடந்த சிலநாட்களுக்கு முன்பு டோனி சென்னையில் பார்க் ஷெராட்டன் ஓட்டலில் தங்கியிருந்தபோது இந்த ஆர்ப்பாட்டம் நடைபெற்றது. ஆர்ப்பாட்டத்தின் போது மதுபான விளம்பரங்களில் நடிக்கக்கூடாது என்றும் சென்னையில் வைக்கப்பட்டுள்ள விளம்பர படங்களை உடனடியாக அகற்றவேண்டும் என்றும் கோரிக்கை வைத்தனர். இந்த நிலையில் சென்னை நகரில் பல்வேறு பகுதிகளில் வைக்கப்பட்டிருந்த டோனி நடித்த விளம்பர படங்கள் அகற்றப்பட்டன.

இதுகுறித்து பசுமைத் தாயகம் அமைப்பின் மாநில செயலாளர் அருள் கூறியது:

                        முன்னாள் மத்திய மந்திரி டாக்டர் அன்புமணி ராமதாஸ் கோரிக்கையை ஏற்று சென்னை நகரில் அனைத்து பகுதிகளிலும் வைக்கப்பட்டிருந்த டோனி விளம்பர படங்கள் அகற்றப்பட்டதை வரவேற்கிறோம். அதே நேரத்தில் ஐ.பி.எல். கிரிக்கெட் போட்டிகளில் பங்கேற்கும் ஒவ்வொரு அணியும் மதுபான நிறுவனங்களிடம் பணம் பெற்றுக்கொண்டு மது பானங்களை சிறுவர்களிடமும் இளைஞர்களிடமும் திணிக்கிறார்கள். இந்த தவறான செயலை அனைத்து ஐ.பி.எல். அணிகளும் கைவிடவேண்டும் என்றார்.

கடலூர் மாவட்ட செய்திகள்

பசுமைத் தாயகம் சார்பில் டோனிக்கு எதிராக ஆர்ப்பாட்டம்

 பசுமைத் தாயகம் வெளியிட்டுள்ள செய்திக்குறிப்பு    

  

           சென்னையில் சேமியர்ஸ் சாலையில் உள்ள நட்சத்திர ஓட்டல் ஒன்றில்  கிரிக்கெட் வீரர் டோனி தங்கி உள்ளார். மறைமுக மதுபான விளம்பரங்களில் நடிப்பதற்கு டோனிக்கு  எதிர்ப்பு தெரிவித்து பசுமைத் தாயகம் சார்பில் ஆர்ப்பாட்டம் நடைபெற்றது. இதில், 100 பேர் கைது செய்யப்பட்டனர்.

கடலூர் மாவட்ட செய்திகள்

பா.ம.க.வின் பசுமைத்தாயகம் அமைப்பின் சார்பில் 20 லட்சம் மரக்கன்றுகளை நட்டுள்ளோம்: அன்புமணி ராமதாஸ்

மாமல்லபுரம்:

          பசுமையான தமிழகத்தை உருவாக்க இதுவரை 20 லட்சம் மரக்கன்றுகள் நட்டுள்ளோம் என, முன்னாள் மத்திய அமைச்சர் அன்புமணி ராமதாஸ் கூறினார்.

மாமல்லபுரத்தில் நடந்த பாமக பிரமுகர் இல்ல திருமண விழாவில் கலந்து கொண்டு பேசிய பாமக இளைஞர் அணி தலைவரும், முன்னாள் மத்திய அமைச்சருமான அன்புமணி ராமதாஸ்,

               இளைஞர்கள் மது, புகையிலை போன்ற போதைப்பழக்கத்தினால் தவறான பாதையில் சென்று சீரழிந்து கொண்டிருக்கிறார்கள். எனவே தான் மதுவை ஒழிக்க வேண்டும் என்று பா.ம.க. போராடி வருகிறது. தமிழகம் மட்டுமின்றி இந்தியா முழுவதும் மதுவை ஒழிக்க வேண்டும் என்று டாக்டர் ராமதாஸ் வலியுறுத்தி வருகிறார். பசுமையான, தூய்மையான தமிழகத்தை உருவாக்க பா.ம.க.வின் பசுமைத்தாயகம் அமைப்பின் சார்பில் தமிழகம் முழுவதும் இதுவரை 20 லட்சம் மரக்கன்றுகளை நட்டுள்ளோம். நீர் ஆதாரங்களை பெருக்க 500 ஏரிகளை தூர்வாரி உள்ளோம். ஏரியில் உள்ள நீரை சேமிக்க 70 தடுப்பணைகளை கட்டி உள்ளோம். இவை போன்ற சமூக சேவையில் பா.ம.க. தன்னை ஈடுபடுத்தி கொண்டு வருகிறது என்றார்.

கடலூர் மாவட்ட செய்திகள்

பூமி வெப்பமயமாதலைத் தடுப்பது தனி மனிதக் கடமை: சௌமியா அன்புமணி

சென்னை:

                   பூமி வெப்பமயமாதலைத் தடுப்பது ஒவ்வொரு தனி மனிதனுக்கும் உள்ள தலையாய கடமையாகும் என பசுமைத் தாயகம் அமைப்பின் தலைவர் சௌமியா அன்புமணி கூறினார்.  புவி வெப்பம் அதிகரிப்பதைத் தடுக்க பசுமைத் தாயகம் அமைப்பின் சார்பாக 350 மரக்கன்றுகள் நடும் நிகழ்ச்சி சென்னையில் ஞாயிற்றுக்கிழமை நடைபெற்றது.  

இதில் பசுமைத் தாயகம் அமைப்பின் தலைவர் சௌமியா அன்புமணி பேசியது: 

                  புவி வேகமாக வெப்பமடைந்து வருவதன் விளைவாக ஏற்படும் காலநிலை மாற்றத்தால் மிகப் பெரிய ஆபத்துகள் உண்டாகும். இந்த நிலை நீடிக்குமேயானால் எதிர் காலங்களில் மனித சமுதாயமே அழியக்கூடும் என விஞ்ஞானிகள் கருத்து தெரிவித்துள்ளனர். அதிக அளவில் வெளியேற்றப்படும் கரியமில வாயுவே இதற்கு முக்கிய காரணமாகும்.  இதன் காரணமாக, வளிமண்டலத்தில் கரியமிலவாயுவின் அளவு கணிசமாக அதிகரித்துள்ளது. இந்த அளவைக் குறைக்க வேண்டிய கட்டாயத்தில் நாம் இருக்கிறோம்.  

                மரங்களை அதிக அளவு வளர்ப்பதன் மூலமாகவே எதிர் வரும் பேரழிவிருந்து நம்மைப் பாதுகாத்துக் கொள்ள முடியும்.  பூமி வெப்பமடைவதற்கு அமெரிக்கா, ஐரோப்பா உள்ளிட்ட வளர்ந்த நாடுகளே காரணமாக இருக்கிறது. தனி நபர் அளவில் பார்க்கும் போது மற்ற நாடுகளை விட பத்து மடங்கு அதிகமான கரியமில வாயுவை வளர்ந்த நாடுகள் வெளியிடுகின்றன. ஆனால், இந்தியா உள்ளிட்ட நாடுகளே இதனால் அதிகமாக பாதிப்படுகின்றன.  பூமி வெப்படைதலைத் தடுப்பது குறித்த பேச்சுவார்த்தைகள் ஐ.நா. சபையின் காலநிலை மாற்றப் பிரிவினால் நடத்தப்பட்டு வருகின்றது. 

                     வரும் டிசம்பர் மாதம் மெக்சிகோவில் நடைபெறும் மாநாட்டில் இறுதி ஒப்பந்தம் எட்டப்பட இருக்கிறது. இது இந்தப் பிரச்னையை தீர்க்க நல்ல வாய்ப்பாக அமையும்.  பிரச்னையின் தீவிரத்தை உணர்ந்து மக்கள் அனைவரும் ஒன்றுபட்டு இதற்கு தீர்வு காண வேண்டும. பூமி வெப்பமயமாதலைத் தடுப்பது ஒவ்வொரு தனி மனிதனின் தலையாய கடமையாகும் என்றார் அவர்.  சென்னை ஆழ்வார்ப்பேட்டையில் உள்ள அரசு தொடக்கப் பள்ளியில் பசுமைத் தாயகம் அமைப்பின் சார்பாக  ஞாயிற்றுக்கிழமை நடைபெற்ற மரம் நடும் விழாவில் கலந்து கொண்ட அந்த அமைப்பின் தலைவர் சௌமியா அன்புமணி.

கடலூர் மாவட்ட செய்திகள்

"இயற்கை அழிவுக்கு மனிதனின் சுயநலமே காரணம்': ராமதாஸ்

பசுமைத் தாயகம் அமைப்பு சார்பில் சென்னையில் வெள்ளிக்கிழமை நடைபெற்ற நிகழ்ச்சியில் நாளைய சென்னை - ஆபத்துகளும், தீர்வுகளும் என்ற கண்காட்சியை தொடங்கி வைத்தார்

சென்னை:

 

       இயற்கை அழிக்கப்படுவதற்கு மனிதனின் சுயநலமே காரணம் என்று பாமக நிறுவனர் டாக்டர் ராமதாஸ் பேசினார்.

 

பசுமைத் தாயகம் அமைப்பு சார்பில் சென்னையில் ஏற்பாடு செய்யப்பட்டுள்ள "நாளைய சென்னை - ஆபத்துகளும், தீர்வுகளும்' என்ற கண்காட்சியை வெள்ளிக்கிழமை தொடங்கி வைத்து அவர் பேசியது:

 

             இன்றைய சென்னை மாநகரம் எப்படி உள்ளது நாளைய சென்னை எப்படி இருக்க வேண்டும் என்பது குறித்து பசுமைத் தாயகம் அமைப்பு சார்பில் கண்காட்சி ஏற்பாடு செய்யப்பட்டுள்ளது.இயற்கை நமக்கு அளித்த கொடைகளான நிலம், நீர், காற்று ஆகியவற்றை மனிதர்கள் அழித்து வருகிறார்கள். சென்னை மாநகரம் மனிதர்கள் வாழ்வதற்கு தகுதியற்ற நகரமாக மாறிவிட்டது. இதனை உச்ச நீதிமன்ற நீதிபதிகளே வேதனையுடன் குறிப்பிட்டுள்ளனர்.இன்று மனிதன் இயற்கைக்கு மாறான வாழ்க்கை வாழ தொடங்கியுள்ளான். 

 

            உணவு பழக்கவழக்கங்கள் உள்ளிட்ட எல்லாமே மாறிவிட்டன. பாரம்பரியமான கம்பு, சோளம், கேழ்வரகு, தினை, சாமை போன்ற உணவு வகைகளை யாரும் உண்பதில்லை. பொறித்த, வறுத்த, பாட்டிலில் அடைக்கப்பட்ட உணவுகளையே அதிகமாக சாப்பிடுகிறார்கள். இதன்மூலம் மனிதன் தனது வாழ்நாளைச் சுருக்கிக் கொண்டுவிட்டான்.உடல் பருமன் இன்று மிகப்பெரிய பிரச்னையாக உருவெடுத்துள்ளது. அதனால் நீரிழிவு, ரத்த அழுத்தம் உள்ளிட்ட ஏராளமான நோய்கள் ஏற்படுகின்றன. போக்குவரத்து நெரிசல், மக்காத பிளாஸ்டிக் பொருள்களின் பயன்பாடு, சுற்றுச்சூழல் மாசுபாடு ஆகியவற்றினால் ஏற்படும் பாதிப்புகள் குறித்தும், அதற்கான தீர்வுகள் குறித்தும் இந்தக் கண்காட்சியில் விளக்கப்பட்டுள்ளன.

 

             சென்னை மாநகரில் இருந்த ஏரிகள், குளங்கள் உள்ளிட்ட ஏராளமான நீர்நிலைகள் காணாமல் போய்விட்டன. அதனால் நீர்மட்டம் வெகுவாக குறைந்து விட்டது. இதற்கான தீர்வுகளும் கண்காட்சியில் இடம் பெற்றுள்ளன. இதனை மக்கள் பயன்படுத்திக் கொள்ள வேண்டும் என்றார் ராமதாஸ்.பசுமைத் தாயகம் அமைப்பின் தலைவர் சௌம்யா அன்புமணி, பொதுச்செயலாளர் அருள், காங்கிரஸ் எம்.பி. கிருஷ்ணசாமி, முன்னாள் மத்திய இணை அமைச்சர் ஏ.கே. மூர்த்தி உள்ளிட்டோர் விழாவில் பங்கேற்றனர்.

 

                  சென்னை அசோக் பில்லர் அருகில் உள்ள அறிஞர் அண்ணா சமூகக் கூடத்தில் ஞாயிற்றுக்கிழமை (ஜூலை 25) வரை மூன்று நாள்களுக்கு காலை 10 முதல் இரவு 8 மணி வரை அக்கண்காட்சி நடைபெறவுள்ளது.

கடலூர் மாவட்ட செய்திகள்